कागल (सलीम शेख): कागल ते मुरगूड या मुख्य मार्गावर, सिद्धनेर्ली नदीकिनारा येथे 30 मार्च 2025 रोजी रात्री 1 वाजण्याच्या सुमारास एक मोठा अपघात घडला. भरधाव वेगात असलेला एक कंटेनर दूधगंगा नदीच्या पात्रात कोसळला. या अपघातात कंटेनरचे आणि सार्वजनिक मालमत्तेचे मोठे नुकसान झाले आहे, परंतु सुदैवाने कोणतीही जीवितहानी झाली नाही.
पोलिसांनी दिलेल्या माहितीनुसार हा अपघात कागल ते मुरगूड या मुख्य मार्गावर, सिद्धनेर्ली नदीकिनारा येथील दूधगंगा नदीच्या पुलावर झाला.भरधाव वेगात असलेल्या कंटेनरने पुलावरील संरक्षक लोखंडी पूल तोडून नदीच्या पात्रात प्रवेश केला. कंटेनर (क्रमांक RJ-09-GC-2695) राजस्थानमधील अजमेर जिल्ह्यातील सरवाड येथील रहिवासी असलेला 28 वर्षीय चालक कालु राम चौधरी चालवत होता. चालकाने निष्काळजीपणे आणि भरधाव वेगात कंटेनर चालवल्याने हा अपघात घडला.चालकाचे रस्त्याच्या परिस्थितीकडे दुर्लक्ष झाले आणि त्यामुळे कंटेनरवरील नियंत्रण सुटले. कागल पोलिसांनी तातडीने घटनास्थळी धाव घेतली.
