कोल्हापुरात अनधिकृत शीतपेय हातगाड्यांमुळे वाहतूक कोंडी आणि आरोग्याचा धोका! सकल हिंदू समाजाची कारवाईची मागणी!
कोल्हापूर (सलीम शेख) : कोल्हापूर शहरात अनधिकृत शीतपेय हातगाड्यांचे प्रमाण वाढल्याने वाहतूक कोंडी आणि आरोग्याचा प्रश्न गंभीर बनला आहे. या हातगाड्यांवर तातडीने कारवाई करण्याची मागणी सकल हिंदू समाजाने केली आहे. सीपीआर रुग्णालयातील वापरलेल्या बर्फाचा शीतपेयांमध्ये वापर झाल्याचा धक्कादायक प्रकार समोर आल्याने नागरिकांच्या आरोग्याबाबत चिंता व्यक्त होत आहे.
शहरातील रस्त्यांच्या कडेला सरबत, ज्यूस, लस्सी आणि इतर शीतपेयांची विक्री करणाऱ्या अनधिकृत हातगाड्यांची संख्या मोठी आहे. या विक्रेत्यांकडे कोणताही परवाना नसून, ते आरोग्यविषयक नियमांचे पालन करत नसल्याचे निदर्शनास आले आहे. यामुळे नागरिकांच्या आरोग्यास धोका निर्माण झाला आहे.
या गंभीर समस्येबाबत सकल हिंदू समाजाने महापालिकेचे अतिरिक्त आयुक्त राहुल रोकडे यांना निवेदन दिले आहे. आपत्कालीन परिस्थितीत रस्त्यांवरील अनधिकृत गाड्यांमुळे अग्निशमन दल आणि रुग्णवाहिकांना अडथळे येत आहेत. प्रशासनाने या प्रकरणाची तातडीने दखल घेऊन कारवाई करावी, अशी मागणी निवेदनात करण्यात आली आहे.
निवेदनातील प्रमुख मागण्या:
* शहरातील सर्व अनधिकृत शीतपेय हातगाड्यांवर तात्काळ कारवाई करावी.
* आरोग्यविषयक नियमांचे पालन न करणाऱ्या विक्रेत्यांवर कठोर कारवाई करावी.
* सीपीआर रुग्णालयातील वापरलेल्या बर्फाचा गैरवापर करणाऱ्यांवर गुन्हा दाखल करावा.
* भविष्यात अशा घटना टाळण्यासाठी प्रशासनाने ठोस उपाययोजना करावी.
* आपत्कालीन परिस्थितीत रस्त्यांवरील अनधिकृत गाड्यांमुळे अग्निशमन दल आणि रुग्णवाहिकांना अडथळे येऊ नयेत.
सकल हिंदू समाजाने दिलेल्या निवेदनामुळे प्रशासनाने या गंभीर समस्येकडे लक्ष देऊन तातडीने कारवाई करावी, अशी मागणी नागरिकांकडून होत आहे.
