दिव्यांग क्रिकेट रसिकांसाठी पर्वणी! रत्नागिरीत रंगणार पश्चिम महाराष्ट्रातील तीन दिग्गजांचा तिरंगी सामना!
कोल्हापूर (सलीम शेख) : दिव्यांग युवा प्रतिष्ठान रत्नागिरी यांच्या वतीने आयोजित भव्य दिव्यांग क्रिकेट स्पर्धा येत्या शनिवार, दिनांक २६ आणि रविवार, दिनांक २७ एप्रिल २०२५ रोजी सावंत स्टेडियम, रत्नागिरी येथे संपन्न होणार आहे. या रोमांचक तिरंगी लढतीत पश्चिम महाराष्ट्रातील नामांकित संघ रत्नागिरी, कोल्हापूर, आणि बीड एकमेकांशी दोन हात करणार आहेत.
आंतरराष्ट्रीय स्तरावर आपल्या खेळाची छाप सोडलेले खेळाडू प्रशांत सावंत सर यांनी क्रिकेट रसिकांना या तिरंगी दिव्यांग क्रिकेट स्पर्धेचा आनंद घेण्यासाठी खास निमंत्रण दिले आहे.
कोल्हापूर दिव्यांग संघाचे नेतृत्व जगदीश शिंगाडे (कर्णधार) आणि उत्तम चौगुले (उपकर्णधार) करणार आहेत. संघातील इतर प्रमुख खेळाडू पुढीलप्रमाणे आहेत: प्रभाकर पाटील, भिकाजी कांबळे, अविनाश चव्हाण, सुमित शिंदे, राहुल सुतार, विकास अनुसे, शाहरुख तांबोळी, राजेंद्र सुतार, सिद्धेश पाटील, विनोद हुजूराणी.
विशेष बाब म्हणजे, गांधीनगर ग्रामपंचायतीचे उपसरपंच विनोद हुजूराणी यांनी कोल्हापूर संघातील सर्व खेळाडूंना क्रिकेट किट प्रदान केले आहे. कोल्हापूर दिव्यांग क्रिकेट संघाच्या व्यवस्थापनाची जबाबदारी अतुल धनवडे यांच्याकडे सोपवण्यात आली आहे, तर दिव्यांग सेना सामाजिक संघटनेचे अध्यक्ष उत्तम चौगुले यांचे मार्गदर्शन संघाला लाभले आहे.
सावंत स्टेडियम, रत्नागिरी येथे होणाऱ्या या तिरंगी दिव्यांग क्रिकेट स्पर्धेत खेळाडू आपल्या उत्कृष्ट खेळाचे प्रदर्शन करतील यात शंका नाही. क्रिकेट प्रेमींसाठी ही स्पर्धा एक अविस्मरणीय अनुभव असेल. तेव्हा, या शानदार खेळाचा आनंद घेण्यासाठी नक्की उपस्थित राहा असे अहवान करण्यात आले.
