विहिरीत मगरीची पिल्ले आढळल्याने भीतीचे वातावरण; ग्रामस्थांना सतर्कतेचा इशारा!
कोगनोळी (सलीम शेख ) : रुई गावात मगरीच्या हल्ल्याची घटना ताजी असतानाच, आता येथील सुळकुड रोडलगतच्या एका विहिरीमध्ये मगरीची पिल्ले आढळून आल्याने ग्रामस्थांमध्ये भीतीचे वातावरण निर्माण झाले आहे. या विहिरीत मोठी मगर असण्याची शक्यता वर्तवली जात आहे.
काही दिवसांपूर्वी याच विहिरीत एक मगर दिसली होती. वनविभागाच्या अधिकाऱ्यांनी तिला पकडण्याचा प्रयत्नही केला, परंतु ती सापडली नाही. आज, बुधवारी सकाळी काही शेतकऱ्यांना या विहिरीशेजारील एका खड्ड्यात मगरीची पाच जिवंत पिल्ले आणि काही अंडी दिसली. यामुळे गावात एकच खळबळ उडाली आहे.
या घटनेनंतर ग्रामस्थांना सतर्कतेचा इशारा देण्यात आला असून, सर्वांनी काळजी घेण्याचे आवाहन करण्यात आले आहे. मोठी मगर परिसरातच असण्याची शक्यता असल्याने नागरिकांनी विशेषतः लहान मुलांनी विहिरीच्या आसपास जाऊ नये, असे आवाहन वनविभागाकडून करण्यात आले आहे. वनविभाग मगरीचा आणि तिच्या पिलांचा शोध घेऊन त्यांना सुरक्षित ठिकाणी हलवण्याचे प्रयत्न करत आहे.
