गोकुळ शिरगाव (सलीम शेख ) : करवीर तालुक्यात वसलेले गोकुळ शिरगाव हे गाव केवळ आपल्या नावाप्रमाणेच श्रीकृष्ण मंदिर आणि गोकुळ दूध या दोन गोष्टींसाठी महाराष्ट्रातच नव्हे, तर संपूर्ण भारतात प्रसिद्ध आहे. या गावाचा निसर्गरम्य परिसर आणि ऐतिहासिक महत्त्व पर्यटकांना आणि भाविकांना नेहमीच आकर्षित करत असते.
गोकुळ शिरगावामध्ये एक प्राचीन श्रीकृष्ण मंदिर आहे, ज्याची महती करवीर गाथा महालक्ष्मी अंबाबाई या पौराणिक ग्रंथातही नोंदवलेली आहे. हे मंदिर केवळ त्याच्या स्थापत्यकलेसाठीच नव्हे, तर त्याच्या पवित्र वातावरणासाठीही ओळखले जाते. मंदिराच्या परिसरात भगवान श्रीकृष्ण आणि गायींच्या पावलांचे ठसे असल्याने भाविकांच्या श्रद्धेचे केंद्र बनले आहे. या मंदिराच्या जवळच गोवर्धन पर्वताच्या नावाने ओळखला जाणारा एक मोठा डोंगर आहे, जो या परिसराच्या नैसर्गिक सौंदर्यात भर घालतो.
या गावातील सर्वात महत्त्वाचे आणि सध्या चर्चेत असलेले वैशिष्ट्य म्हणजे मंदिराच्या जवळ असलेला मनमोहक धबधबा. पावसाळ्याच्या रिमझिम सरींमुळे हा धबधबा सध्या पूर्णपणे प्रवाहित झाला आहे आणि त्याचे विहंगम दृश्य पाहण्यासाठी कोल्हापूर जिल्ह्यातील अनेक निसर्गप्रेमी आणि धबधबाप्रेमी येथे गर्दी करत आहेत.
गोकुळ शिरगावमध्ये श्रीकृष्ण मंदिराव्यतिरिक्तही अनेक लहान-मोठी मंदिरे आहेत, जी गावाच्या धार्मिक आणि सांस्कृतिक परंपरेची साक्ष देतात. गोकुळ शिरगावची ख्याती आता केवळ महाराष्ट्रापुरती मर्यादित राहिलेली नसून, ती संपूर्ण भारतात पसरली आहे. निसर्गाची मुक्त उधळण, आध्यात्मिक शांतता आणि ऐतिहासिक पाऊलखुणा यांचा संगम असलेले हे गाव प्रत्येकाने एकदा तरी अनुभवायला हवे.
