माणगाव स्पर्श भूमी प्रवेशद्वार कमानीबाबत समाजकल्याण आयुक्त सचिन साळे यांच्याशी सकारात्मक चर्चा!
माणगाव (सलीम शेख ) : माणगाव येथील ‘स्पर्श भूमी’ प्रवेशद्वार कमानीसंदर्भात आज समाजकल्याण आयुक्त सचिन साळे यांच्याशी सकारात्मक चर्चा करण्यात आली. यावेळी आयुक्तांनी सांगितले की, संबंधित प्रवेशद्वार कमानीबाबत गेली तीन वर्षांपासून पत्रव्यवहार सुरू आहे.
या कमानीच्या आराखड्याचे आणि कामकाजाचे मार्गदर्शन इतिहास संशोधक इंद्रजीत सावंत, इतिहास संशोधक डॉ. जयसिंगराव पवार आणि आंबेडकरी विचारवंत तसेच प्रकाशक प्रदीप आगलावे यांच्या देखरेखेखाली सुरू आहे. समाजकल्याण आयुक्त सचिन साळे यांनी दिलेल्या माहितीनुसार, या कमानीवर बौद्ध स्तूपाचे शिलालेख असतील. तसेच, डॉ. बाबासाहेब आंबेडकर आणि छत्रपती शाहू महाराज यांच्या नावासाठी स्वतंत्र कोनशिला तयार करण्यात आली असून त्यावर सुसज्ज पद्धतीने नावे कोरण्यात येणार आहेत.
आयुक्तांनी पुढे सांगितले की, या कमानीसाठी माणगाव बौद्ध समाजातून एकाही व्यक्तीचा विरोध नसून, या संदर्भात एक बैठकही पार पडली आहे. तरीही काही शंका किंवा तक्रार असल्यास त्यावर तोडगा काढण्यासाठी उद्या (गुरुवार, १२जून २५) प्रांताधिकारी यांच्या कार्यालयात एक बैठक आयोजित करण्यात आली आहे. या बैठकीत नागरिकांनी उपस्थित राहावे, असे आवाहन आयुक्तांनी केले आहे.
यावेळी आंबेडकरवादी सेनेचे संस्थापक अध्यक्ष सुहास हुपरीकर आणि भादोले रमेश कांबळे आदी उपस्थित होते.
