वीज सुरक्षा कर्मचारी आणि ग्राहकांसाठी महत्त्वाची – कार्यकारी अभियंता दत्तात्रय भणगे!

कागल ( सलीम शेख ) : महावितरण कंपनीने (महाराष्ट्र राज्य वीज वितरण कंपनी लिमिटेड) १ जून ते ६ जून या कालावधीत संपूर्ण महाराष्ट्रासह कोल्हापूर जिल्ह्यात विद्युत सुरक्षा सप्ताह आयोजित केला होता. या सप्ताहाचा उद्देश कर्मचारी आणि ग्राहक या दोघांमध्येही वीज सुरक्षेबद्दल जागरूकता निर्माण करणे हा होता.
आज, कार्यकारी अभियंता दत्तात्रय भणगे यांच्या नेतृत्वाखाली कागल येथे विद्युत सुरक्षा फेरीचे आयोजन करण्यात आले होते. छत्रपती शिवाजी महाराज पुतळ्यापासून सुरू झालेली ही फेरी गहिनीनाथ गैबी चौकापर्यंत काढण्यात आली, ज्यातून महत्त्वाच्या सुरक्षा सूचनांकडे लक्ष वेधण्यात आले.

मुख्य अभियंता स्वप्नील काटकर आणि अधीक्षक अभियंता गणपत लटपटे यांच्या मार्गदर्शनाखाली, कार्यकारी अभियंता दत्तात्रय भणगे यांच्या नेतृत्वाखाली कागल उपविभागातील सर्व अधिकारी आणि कर्मचाऱ्यांनी यात सक्रिय सहभाग घेतला.
भणगे यांनी सांगितले की, ६ जून रोजी असलेल्या महावितरणच्या स्थापना दिनानिमित्त या सप्ताहाचे आयोजन करण्यात आले होते. वीज ग्राहकांमध्ये वीज सुरक्षा आणि वीज बचतीबद्दल जनजागृती करणे हा या सप्ताहाचा मुख्य उद्देश होता.
कर्मचाऱ्यांनी लाईनवर काम करताना योग्य विद्युत सुरक्षा उपकरणे वापरावीत, अर्थिंग रॉडचा वापर करावा, तसेच ग्राहकांमध्ये वीज सुरक्षा आणि वीज बचतीची जनजागृती करावी, आणि विजेसंबंधीच्या सर्व नियमांचे पालन करावे, असे आवाहनही त्यांनी पुढे केले.
महत्त्वाचे सुरक्षा संदेश

या सुरक्षा फेरीत लावण्यात आलेले फलक उपस्थितांचे लक्ष वेधून घेत होते, ज्यावर “विद्युत खांबांना जनावरे बांधू नका,” “विद्युत तारांवर कपडे वाळत घालू नका,” आणि “वीज वाचवा, देश वाचवा” असे महत्त्वाचे संदेश होते.
उपस्थित मान्यवर
यावेळी महावितरणचे नरेश घाटगे काटक, अतिरिक्त कार्यभार उपकार्यकारी अभियंता रवींद्र सदानंद, शाखा अभियंता मृणाल वाकणकर, हर्षल कांबळे, अभिलाष बारापात्रे, जेरॉन गोदाद, अभिजित चव्हाण, कुलदीप गायकवाड, अनिकेत लोहार, चिन्मयराज चिवटे, महेश पाटील यांच्यासह शौकत मुल्लानी, श्रीकांत स्वामी, श्रीकांत सातपुते, कागल उपविभागांतर्गत सर्व शाखांचे लाईनस्टाफ कर्मचारी, बाह्यस्रोत कर्मचारी आणि विद्युत ठेकेदार विजय उबाळे उपस्थित होते.