धुंडवडे: (विलास पाटील) धुंदवडे खोऱ्यात यावर्षी प्रधानमंत्री आवास योजना, रमाई आवास योजना आणि मनरेगा आवास योजनेअंतर्गत मोठ्या प्रमाणावर घरांचे बांधकाम सुरू आहे. मात्र, यंदा मान्सूनपूर्व पाऊस आणि अवकाळी पावसाने अपेक्षेपेक्षा लवकर हजेरी लावल्यामुळे या बांधकामांना मोठा फटका बसला होता. जून महिन्याच्या सुरुवातीपर्यंत आपली घरे पूर्ण होतील, या आशेवर असलेल्या सामान्य नागरिकांच्या अपेक्षांवर पावसाने पाणी फिरवले होते.
सलग कोसळणाऱ्या पावसामुळे अनेक घरकुलांची कामे थांबली होती, ज्यामुळे रहिवाशांना मोठ्या अडचणींचा सामना करावा लागत होता. आता गेले चार दिवस पावसाने काहीशी उसंत घेतल्याने, धुंदवडे खोऱ्यातील नागरिकांनी पुन्हा एकदा आपल्या घरकुलांची अपूर्ण कामे पूर्ण करण्यासाठी कंबर कसली आहे.
‘कसेबसे का होईना, आपले घर पूर्ण करून घ्यायचेच’ या निर्धाराने सामान्य नागरिक कामाला लागले आहेत. पावसामुळे थांबलेल्या कामांना आता वेग आला असून, बांधकाम मजूर आणि कारागीर देखील उत्साहाने कामावर परतले आहेत. पावसाने दिलेल्या या तात्पुरत्या विश्रांतीचा फायदा घेऊन, लवकरात लवकर आपले निवारा पूर्ण करण्याची नागरिकांची धडपड सुरू आहे.
यावर्षी पावसाने लवकरच हजेरी लावल्याने अनेक घरांचे छत अर्धवट राहिले होते, तर काहींची भिंतींची कामे थबकली होती. आता वातावरण थोडे निवळल्याने, मातीकाम, विटांचे बांधकाम आणि छताच्या कामांना प्राधान्य दिले जात आहे. प्रशासनाने देखील या कामांना गती देण्यासाठी काही उपाययोजना कराव्यात, अशी मागणी स्थानिक नागरिकांकडून केली जात आहे, जेणेकरून पावसाळ्यापूर्वी जास्तीत जास्त घरे पूर्ण होऊ शकतील.
येत्या काळात पाऊस पुन्हा सक्रिय होण्याची शक्यता असल्याने, सध्या मिळालेल्या वेळेचा सदुपयोग करून आपली घरे पूर्ण करण्याचे आव्हान धुंदवडे खोऱ्यातील नागरिकांसमोर आहे.
